指人飲（A）
你話事，指定任何一個人飲
- 抽牌嘅人揀枱上任何一個人飲一啖。
飲酒遊戲規則同玩法教學
A 至 K 每張牌點玩，一次講清楚。
點樣玩
- 大家圍埋一枱，將手機擺喺中間。
- （可選）喺設定入玩家名，網站會自動話你知輪到邊個、上家下家係邊個。
- 輪流撳「抽牌」，照住畫面上嘅規則做。
- 抽完成副牌會自動重新洗牌，可以一直玩落去。
飲嘢玩 game 最開心，但規則通常靠口耳相傳，玩到一半又要搵對照表。酒Game大排檔將抽牌同規則放埋一齊：撳一下抽牌，規則同玩法即刻出嚟，唔使帶啤牌，一部手機就玩得。
陪飲員（2）
你係陪飲員：之後有人飲，你都要陪佢飲
- 抽到 2 嘅人做「陪飲員」。
- 之後無論邊個要飲，陪飲員都要同佢一齊飲。
- 直到下一個人抽到 2，先換新陪飲員。
大細波（3）
做大波動作要講「細波」，相反亦然，錯就飲
- 由抽牌嘅人開始，輪流做動作同時講嘢。
- 雙手喺胸前畫個大圈（大波），口要講「細波」；畫個細圈（細波），口要講「大波」。
- 動作同講嘅嘢一定要相反，做錯或者講錯嘅人飲一啖。
開規矩（4）
定一條新規矩，之後犯規就飲
- 抽牌嘅人定一條規矩，成局遊戲都有效。
- 任何人犯規就要飲一啖。
- 之後抽到 4 嘅人可以再開新規矩，或者取消之前嘅規矩。
例如：唔准講「飲」字、唔准用手指指人、講嘢之前要講「報告」
圍枚（5）
同枱上每個人逐一猜枚，輸就飲
- 抽牌嘅人同枱上每個人逐個猜一次枚。
- 猜咩枚自己揀，例如包剪揼、十五二十。
- 每一局輸咗嘅人飲一啖。
例如：十五二十：兩人每隻手出拳頭（0）或者打開（5），同時嗌 0、5、10、15 或 20，嗌中兩人加埋總數嘅贏
開心返埋嚟（6）
定一個話題輪流講，講唔出或者重複就飲
- 抽牌嘅人定一個話題。
- 由佢開始，輪流講一樣同呢個話題有關嘅嘢。
- 講唔出、講錯或者講重複嘅人飲一啖。
例如：港鐵站名、茶餐廳飲品、香港歌手
拍 7（7）
輪流報數，有 7 字或者 7 嘅倍數要拍手
- 抽牌嘅人是但講一個數字開始，其他人順次序報下一個數。
- 數字有 7 字（例如 17、27）或者係 7 嘅倍數（例如 14、21），唔可以講出口，要拍手代替。
- 拍手之後方向倒轉，輪返去上家繼續報數。
- 講咗出口、冇拍手或者拍錯嘅人飲一啖。
廁所牌（8）
收埋呢張牌，想去廁所嗰陣用
- 抽到嘅人可以收埋呢張牌。
- 想去廁所嗰陣拎出嚟就可以去。
- 冇廁所牌想去點算？飲一啖先去，定係唔准去，你哋自己定。
撞機（9）
冇次序咁由 1 開始報數，撞到或者最後報嘅飲
- 所有人冇固定次序，由 1 開始，隨時講下一個數字，每人只可以講一次。
- 兩個人同時講同一個數字（撞機），兩個都要飲。
- 講返之前講過嘅數字都要飲。
- 最後一個未報數嘅人飲一啖。
癡線佬（10）
你係癡線佬，有人應你就要飲
- 抽到 10 嘅人做「癡線佬」，可以隨時搵人講嘢、問問題。
- 任何人應咗癡線佬，就要飲一啖。
- 直到下一個人抽到 10，先換新癡線佬。
上家飲（J）
你上家飲一啖
- 抽牌嘅人嘅上家（即係上一個抽牌嘅人）飲一啖。
下家飲（Q）
你下家飲一啖
- 抽牌嘅人嘅下家（即係下一個抽牌嘅人）飲一啖。
自己飲（K）
抽到嘅人自己飲，飲啦飲啦！
- 抽到 K 嘅人自己飲一啖，冇得推。
免飲牌（鬼牌）
收埋佢，之後可以抵一次飲
- 抽到嘅人可以收埋呢張牌。
- 之後要飲嗰陣拎出嚟，就可以唔使飲一次。
常見問題
酒Game大排檔要唔要錢？
完全免費，唔使註冊，打開網頁就玩得。
要唔要下載 app？
唔使。用手機瀏覽器打開就得；想方便啲可以「加到主畫面」，之後冇網都玩到。
冇啤牌都玩得？
玩得。網站會幫你洗牌同抽牌，一部手機擺喺枱中間就夠。
我哋玩法唔同，可唔可以改規則？
可以。喺遊戲頁嘅「設定」→「自訂規則」，每張牌都可以改成你哋自己嘅玩法。
唔飲酒可唔可以玩？
可以，用汽水、茶或者罰其他嘢代替飲酒就得。未滿 18 歲唔可以飲酒。
理性飲酒
遊戲係為咗開心，唔係為咗飲醉。「飲一啖」就係一啖，唔使成杯乾晒；唔飲酒嘅朋友可以用汽水、茶代替。飲酒唔好揸車，未滿 18 歲唔可以飲酒。